ورد ريوف الشمري

موضوع: ورد ريوف الشمري الجمعة مارس 14, 2008 4:17 am

مِزْن شعري هَطَلْ فوق الورق مَاهِن
وين ما وجَّهَنْ زانتْ مناقِعْهِن
دام ربّي بحرف الحقّ علاهِن
ما نْخَلق مِسْكِت مْزوني وِ مانِعْهِن
يمِّ (خالد) هبوب الخير ودّاهِن
وَهْدِيَ الخير قاريهِن وِ سامعْهِن
يالمريخي حُروفي هاك معْناهِن
خُوَّة الدين يابْن الناس دافِعْهِن
آهِ يا بْيوت شعرٍ كل ما اقْراهِن
في صِميم الحشا تنْبِض مواجِعْهِن
صادِفنَّك (ثلاث احْترتْ ويَّاهِن)
شيِّ وارِد مادام (ابْليس) رابِعْهِن
(زاهياتٍ براقعهن وتزهاهن)
يا عنا قلب (خالد) مِن براقِعْهِن
قِمْتِ تَرْوي على نفْسِك مزاياهِن
مِطْلِقٍ سَهْمِ عينك في مراتِعْهِن
طُولِهنْ ... لِبْسِهِنْ .. حتى وِ مَمْشاهِن
ما بِقى إلا عليك اتْقِزّ اصابِعْهِن
وَ آعذابِك دِبَكْ بالقلب ماطاهِن
بَعْثَرنْ بِك حروفٍ كِنتْ جامِعْهِن
غرِّقَنَّك وَ لا دلّيتْ مرساهِن
قَدّ الأمواج يومِ اْنِّك تِصارِعْهِن؟!!!!
لو صَرفْت النِظر حتى تَعدّاهِن
كان الاضلاع بك ما فَزّ هاجِعْهِن
عَلِّم عْيونك اللي (برْقِع) أنْساهِن
حُكْم (غضّ البصر) واحْذر تِطاوِعْهِن
..
ثُم جِبْت المِطِِمَّه تِقْلِ تجْزاهِن
قُمْتِ (تَلْعَن) وِ ليت اللعْن رادِعْهِن
لا دَخلْ بالقِصايد (لَعْن) وَطَّاهِن
يَنْفِث السُمِّ في صافي منابِعْهِن
حَرِّمه مِن عَطا القيفان و اهْداهِن
كِل شاعر تَغنَّا في مراتِعْهِن
رَبِّ جمَّل سِماواتَهْ وِ سوّاهِن
سبعةٍ دونِما عمدان رافِعْهِن
وِشْ لك (بجدهن) لَوْ حَيِّ رَبَّاهِن
يَسْتِرِنْ عِن هوى الناظر براقِعْهِن
وْ كان (بالسّوط) خوّفْهِن وِ ورِّاهِن
وِ انْ عَصَنْ عَشَّاْ سوطه مِن مِذارِعْهِن
..
أما قولك (بجنبي شَخص ناداهن)
(قلت ذي فرصتي بقصد واسمعهِن)
كِل مِن (ضَبْعِهِن) بالسوق خلاهِن
ما تَعَجَّب إذا (غيره) يتابِعْهِن
و اللي قَدَّر حيا الخفْرات واغْلاهِن
ما يِطارِد حريمٍ في براقِعْهِن
للبِنِي قُمْ يا خالد طِيب وانْصاهِن
خِذ كلامي وصُبَّه في مسامعْهِن
مِظْهِرات العيون لْكل من جاهِن
شاري الطيب و الزّينات بايعْهِن
البراقع مفاتن و البِنِي مَاهِن
نازِلات الفِتن و الدين رافعْهِن ورد ريوف الشمري Frown

ينْزِلِنْ مِن مِشى الميلات ماطاهِن
يَعْرِضِنْ للملا فاسِد بضايعْهِن
البِنِي يزْهَن الحِشمه وِ تزْهاهِن
مَنْبَع الطيب ينْهل من منابِعْهِن
أشْهد انْ مِنْ سِمَا (بالدين) مرْباهِن
ما تِجِيب الرِجال الا مِزارِعْهِن
حِيِّهِنْ ... حَيِّهِنْ .. والشعْر حيّاهِن
واتْرِك اللي بَلَنِّكْ في براقِعْهِن
وْ قِلْ بَعد للشِباب اللي تِمنّاهِن
البراقع مدافِع يا مِطالِعْهِن
لا تِوقِّف كِذا قِدام مَرْماهِن
اِنْحش اِنْحش و انا اخْتِك عَن مدافعْهِن

أعجبتني وأتمنى تعجبكم ورد ريوف الشمري Smile