كيف نجعل من هذا المنتدى الأفضل ؟
* ماهو المنتدى ..!! المنتدى هو بيتك الثاني وفية اصدقائك واخوانك يشاركون معك في المعرفة وفي المزح ويزعلون لزعلك ويفرحون لفرحك
وفي هالوقت كثرت المنتديات وصار هناك سباق للمنتديات وكل عضو يتمنى أن منتداه هو الأفضل ويتفاخر بين اصداقائه بهذا الشئ
فكيف نجعل منتدانا هو الأفضل ؟؟
الحل بسيط
* اولاً : (( تشجيع الأعضاء الجدد ))هذي هي البداية وأنت أكيد تتذكر أول يوم جيت فية للمنتدى وكتبت موضوع وكم تمنيت يرد علية الكل ،، وبتشجيعنا للأعضاء الجدد فنحن نحثهم على الأبداع فمنهم سيخرج لنا كتاب رائعين في الأدب والشعر وكتاب متميزين في الادب أو في أي مجالات آخرى
والعضو الي دايم يكون الأول في الترحيب ،، حبيب وقلبه طيب
* ثانياً : (( قبل أن تكتب أي موضوع في أي قسم معين يجب أن ترد على موضوعين اوثلاث او اكثر )) وهذا شئ مهم جداً ،، لأن هذا تواصل بين الأعضاء وتشجيع لهم وأي عضو يفرح بكل رد على موضوعه ويحثه على الأبداع أكثر فاكثر وأنت أذا رديت على موضيعهم الكل بيرد على موضوعك إذا كان يستحق .
والعضو الي دايم يرد على المواضيع يسمى ،، محبوب الكل
* ثالثاً : (( تشجيع المواضيع التي يكتبها اصحابها )) أن تكتب أنت موضوع بجهدك أفضل مليون مره من نقله أو نسخه من منتدى ثاني فالمستفيد الوحيد هو صاحب الموضوع الذي كتبه بجهده ولأنه موضوع رائع فالكل ينسخه وينشره في كل المنتديات ،، أكتب فكره أو معلومه أو انقل من كتاب او مجلة مايستحق النشر
والعضو الي دايم يكتب مواضيعه بنفسه ،، هذا نشيط ومتميز
رابعاً : (( الكلمة السحرية )) وهي أن تكتب كلمة ( شكرا على هذا الموضوع ) كلمات قليله مراح تتعبك او تنقص من قدرك او كبريائك المزيف ،، كثير مانشوف مواضع عدد قرائها فوق السبعين او الثمانين ومن هولاء فقد يرد على صاحب الموضوع واحد او ثنين وأكثر الأحيان تجد الموضوع خالي من أي رد ..!!
يعني أنت تريد الكل ان يرد على موضوعك وأنت ما تكلف خاطرك وتجامل صاحب الموضوع ..
خامساً : (( محاربة الشليلة )) وهذا أكبر خطر يهدد أي منتدى وكثير من المنتديات هرب منها اعضائه لهذا اسبب ،، والشليلة هي أن يتفق الأعضاء ويقولون ( احنا والله شله ارتحنا لبعض ومانبي واحد جديد يدخل بينا ،، والاتفاق هو ان ترد على موضوعي ارد على موضوعك ) ويروح فيها الضعيف ( العضو الجديد ) مايعطونه فرصة حتى يمل وينسحب من المنتدى ،، لا ومن حسن الطباع بعدها بفتره يقلبون على بعض ويصير كل واحد يكتب موضوع وما يرد على الثاني ،، وخلاص انتهى المنتدى وصار من الأفضل أنه المنتدى يتسكر.
سادساً : (( التواصل بين الأعضاء )) التواصل بين الأعضاء في الأفراح نهنيهم وفي الأحزان نواسيهم ( عاد تخيل نفسك مريض او مسافر حتى أهلك مادروا عنك ،، وتجي للمنتدى ولكل مشتاقين لك ويسألون عنك ،، أكيد بتشقق من الفرحه ومحد قدك )
ويسمى العضو الي دايم يسأل عن الاعضاء ،، ياطيب القلب وينك
سابعاً : (( التقليل من المواضيع المنقولة )) بعض الموضيع مهمه ويجب أن تنقل وتنتشر في كل المنتديات ،، لكن مسألة انك تشوف اي موضوع يعجبك وتنقله لا ويمكن يكتب عشر مواضيع في اليوم ( تخصص قص ولصق ) هذي شئ يملل ويجيب العمى ويسمى هذ العضو ،،، مخربها .
ثامناً : (( لاتصير خفيف وثقيل ))يجيك عضو يكتب كل يوم عشر مواضيع وفي كل قسم يكتب له ست مواضيع من كثر ما هو فاضي ،، ويالله يالله نرد على نص مواضيعه ولا نلحق .
تاسعاً : (( التقليل من المشاكل وحوادث السيارات )) يعني ثنين تهاوشوا وقلبوا المنتدى فوق تحت ونقسم المنتدى الى حزبين وكل واحد معه عشرا ويجيب الفزعه
( ياخي بينك وبين اي عضو مشكله او رده ماعجبك او لك ملاحظة ،، ارسله على الخاص وتفاهم أنت وياه بدون مايدري باقي الأعضاء )
ويسمى العضو المشكلجي .
عاشراً : (( خلك جد )) يجي عضو ويتعب ويكتب موضوع جاد ومهم ويتوقع ان بيرد علية ويناقشة الكل وعقبها يجيك عضو و يرد رد بعيد عن الموضوع ،، الموضوع في شمال وهو يرد بالجنوب ،، ويخرب الموضوع ويقلبه نكتــه
( المواضيع الجاده والمهمه تحتاج الى رد جاد وبعكسها المواضيع الساخره )
* وأخيراً * المنتدى ليس بعدد اعضائه ،، بل بترابط اعضائه كالأسرة الواحده وكما قال رسول الله علية افضل الصلاة وسلام (( مثل المؤمنين في توادهم وتعاطفهم مثل الجسد إذا اشتكى منه عضو تداعى له سائر الجسد بالسهر والحمى )) وقولة علية السلام (( المؤمن للمؤمن كالبنيان يشد بعضه بعضا...